ශ්‍රී ලංකාවේ රාජ නාමාවලියේ මුලින්ම සිටින්නේ විජය රජතුමාය. නමුත් එයටත් පෙර සිටම ලංකාව ජනාවාසව පැවති බවට සාක්ෂි ඇත. විජය රජු මෙරටට පැමිණෙන විටත් යක්ෂ, නාග වැනි ගෝත්‍ර වලට අයත් මිනිසුන් මෙරට ජනාවාස සාදාගෙන ජීවත්වූහ. බුදුරජානන් වහන්සේගේ ලංකාගමනයන් මගින්ද මෙරට ජනතාව විසූ බවට සාක්ෂි ලැබේ. තවද විජය රජු මෙරටට පැමිණීමට පෙර සිටම භාරතයේ උතුරු ප්‍රදේශයේ සිට ආර්යයෝ ලංකාවට සංක්‍රමණය වී ඇත. වෙළදාම සදහා මෙන්ම පදිංචිය සදහා ද මෙසේ පැමිණි පිරිස් දිවයිනේ නොයෙක් ප්‍රදේශවල පදිංචි වූහ.